ஹைட்ரோ கார்பன் திட்டத்தை காரைக்காலில் நடைமுறைப்படுத்தக்கூடாது ....... புதுச்சேரி அமைச்சர்களிடம் மனிதநேய மக்கள் கட்சி நேரில் வலியுறுத்தல் ....
இந்நிலையில் புதுச்சேரி மாநில வேளாண் அமைச்சர் கமலக்கண்ணன் மற்றும் சமூக நல அமைச்சர் கந்தசாமி ஆகியோர்களை மனிதநேய மக்கள் கட்சியின் காரைக்கால் மாவட்ட செயலாளர் ஷாஜஹான் தலைமையில், மாவட்ட துணை செயலாளர்கள் அக்பர்ஷா, ஹாஜா மெய்தீன், மனிதநேய வணிகர் சங்க மாவட்ட செயலாளர் அன்வர், காரை வடக்கு தொகுதி செயலாளர் முஹம்மது இப்ராஹீம் ஆகியோர் நேரில் சந்தித்து மனு ஒன்றை அளித்தனர் அம்மனுவில் கூறியிருப்பதாவது :
தமிழக மக்களால் மீத்தேன் திட்டம் விரட்டியடிக்கப்பட்டது. தற்போது ஹைட்ரோ கார்பன் ஆய்வு திட்டம் என்ற பெயரில் சுற்றுச்சூழலுக்கும் மனித உயிர்களுக்கும் கேடு விளைவிக்கும் நாசகரமான திட்டத்தை தனியார் நிறுவனங்களின் மூலம் மத்திய பாஜக அரசு மீண்டும் தமிழகம் மற்றும் புதுச்சேரியில் புகுத்த நினைப்பது வன்மையாகக் கண்டிக்கத்தக்கது.
சுற்றுச்சூழல் பேரழிவை ஏற்படுத்தும் இந்த திட்டத்தால் ஏற்கெனவே வறட்சியாலும், சரியான நீர் ஆதாரம் இல்லாமலும் அங்கொன்றும், இங்கொன்றுமாக நடைபெறும் விவசாயம் முற்றிலுமாக அழியும் சூழல் உருவாகும் அபாயம் உள்ளது.
எனவே, காரைக்கால் மக்களின் நலனுக்கு விரோதமாக மோடி அரசு அனுமதி அளித்துள்ள இத்திட்டத்தை நடைமுறைப்படுத்துவதற்கு எதிராக புதுச்சேரி அரசு எடுக்கும் அனைத்து முயற்சிகளுக்கும் மனிதநேய மக்கள் கட்சி உறுதுணையாக இருக்கும் என்பதை தெரிவித்து கொள்கிறோம்.
